Estellerria abuztuaren 12ko eklipserako prestatzen ari da: behaketa planifikatzeko eta arduraz gozatzeko deia egin du TEDERek

Estellerriko eskualdea leku pribilegiatua izango da abuztuaren 12ko eklipseaz gozatzeko. Jende asko bilduko dela aurreikusten da. Hori dela eta, TEDERek gogorarazi nahi du oso garrantzitsua dela fenomeno horretaz modu seguruan gozatzea.

AZKEN ORDURA ARTE ITXARON GABE: PLANIFIKATU NON IKUSI ETA NOLA AILEGATU

Estellerrian 4 behaketa-puntu ofizial daude, eta urte osoan ari dira lanean eklipsea behatzeko esperientziarik onena errazteko. Hona hemen estekak eta plaza nola erreserbatu:

11.- LERIN  https://eklipsenavarra.com/es/puntos-de-observaci%C3%B3n/lerin  

12.- LODOSA https://eklipsenavarra.com/es/puntos-de-observaci%C3%B3n/lodosa  

14.- MENDABIA https://eklipsenavarra.com/es/puntos-de-observaci%C3%B3n/mendavia  

20.- VIANA https://eklipsenavarra.com/es/puntos-de-observaci%C3%B3n/viana 

Nafarroan dauden 20 behaketa-puntu ofizialetako 4 dira: https://eklipsenavarra.com/es/puntos-de-observacion .  

Ahal bada, prestatutako puntuetara joatea gomendatzen dugu eta bereziki sentikorrak diren, edo iristea zaila den eremu naturalak, saihestuz. Ikusi eklipsea zure herritik, eta murriztu joan-etorriak.

Nafarroako Gobernuak abuztuaren 12ko 00:00etatik abuztuaren 13ko 07:00etara bitartean motordun ibilgailuak landa-pista eta -bideetan ibiltzea debekatu duela gogorarazi nahi da, baso-suteak gertatzeko arrisku handia dagoelako eta mugikortasuna, segurtasun publikoa eta ingurumena babestu behar direlako.

Ingurune naturalera joanez gero, funtsezkoa da kontu handiz ibiltzea, ingurua errespetatzea eta agintarien esanei jarraitzea. Urbasa Andia Parke Naturaletik gogorarazi dute gune babestu hau EZ dela behaketarako gune ofizialetako bat. Balio ekologiko eta paisajistiko handiko naturgune babestua da, eta haren kontserbazioak bateragarria izan behar du jendearen gozamenarekin. Hori dela eta, azkenean bisitatzea erabakitzen dutenek kontuan izan behar dute aparkatzeko edukiera mugatua dela. Egokitutako lekuetan bakarrik aparkatu ahal izango da; ez da bazterbideetan aparkatu behar, ezta baso-pistetan ere, eta larrialdi-zerbitzuetarako sarbideak libre mantendu beharko dira beti.

Era berean, jardunaldian zehar, ezinbestekoa izango da parke naturaleko basozainetako eta gainerako agintari, eskudunetako langileen eta boluntarioen jarraibideak betetzea.

Kontserbazioan laguntzeko, bisitariek sortzen dituzten hondakin guztiak bildu eta eraman beharko dituzte, maskotak lotuta eduki beharko dituzte eta abereak eta basoko fauna eta flora errespetatu beharko dituzte.

Era berean, gogorarazi dute ez dagoela baimenduta karabanetan, autokarabanetan, furgonetetan edo beste edozein ibilgailutan kanpatzea ezta gaua igarotzea ere, Urbasako kanpinean ez bada, behintzat.

Esteka honetan webgune ofiziala eta egun horretarako gomendioei buruzko informazio guztia aurkituko duzu  https://parquenaturalurbasaandia.es/el-parque-natural-de-urbasa-y-andia-apela-a-la-responsabilidad-de-las-personas-visitantes-ante-el-eclipse-solar-del-12-de-agosto 

HARTU NEURRI GUZTIAK ETA SAIHESTU SUTEA ERAGIN DITZAKETEN JOKABIDEAK.

Sute arrisku handiko garaian gaude, beraz: 

• Ez aparkatu belar eta landaretza lehorraren gainean.  

• Ez egin surik edo barbakoarik. Debekatuta dago sua aisialdirako erabiltzea.

• Ez bota zigarrokinik lurrera. Ziurtatu itzali egin dituzula bota aurretik.  

• Ez utzi kristalezko botilarik edo hondakinik. 

• Zaindu fauna eta ingurune naturala: eraman ekartzen duzun guztia eta ez utzi hondakinik.

 

EKLIPSERAKO AUTOBABESA ETA SEGURTASUNA: 

• Erabili EN ISO 12312 2:2015 araua eta benetako CE marka duten eklipse-betaurrekoak. Egiaztatu betaurrekoak ez daudela marratuta, hautsita edo hondatuta. Ez erabili eguzkitako betaurreko normalak, erradiografiak, CDak, kristal ketuak eta etxeko iragazkiak. 

• Ez begiratu Eguzkiari zuzenean babesik gabe. Jarri eta kendu betaurrekoak lehendabizi lurrera begira, ustekabeko esposizioak saihesteko. 

• Teleskopioak, prismatikoak edo kamerak erabiltzen badituzu, eguzki-filtro espezifikoak izan behar dituzte aurrealdean.

• Ez gelditu bazterbidean eklipsea ikusteko: arriskutsua da eta debekatuta dago.  

• Saihestu beharrezkoak ez diren joan-etorriak eklipsearen aurretiko eta ondorengo orduetan.  

• Ez utzi ibilgailua bazterbideetan edo lursailen sarreretan. Aparkatu horretarako prest dauden guneetan soilik. 

• Larrialdi-ibilgailuei pasatzen lagundu une oro.

• Eklipsearen ondoren, ez izan presarik etxera itzultzeko. Itxaron denbora irten aurretik auto-ilarak saihesteko.  

• Nahikoa ur eraman (pertsona bakoitzeko 2 litro inguru gomendatzen dira).  

• Esku-argia eta ordezko pilak eraman.  

• Jantzi arropa arina egunerako eta beroki bat gauerako. 

• Deskargatu offline mapak edo erabili mapa fisikoak, estaldurak huts egin baitezake.  

• Botikak behar badituzu, zurekin eraman. 

Informazio guztia kontsultatzeko (jarduerak, gomendioak, eremuen araberako ikuspena, puntu ofizialetarainoko mugikortasuna) Eklipse 2026 | El día de las dos noches en Navarra 

TEDERetik aparteko fenomeno honetaz gozatzera animatzen zaituztegu, baina Estellerriko inguruarekiko ardura eta errespetua izanez.